2Ch 13 | ZomZIV | STEP | Jeroboam in a uk a kum sawm le giatna kumin Abijah Judah kumpi suaka,

2 Chronicles 13

Judah Kumpipa Abijah

1 Jeroboam in a uk a kum sawm le giatna kumin Abijah Judah kumpi suaka, 2 Jerusalem ah kum thum sung a uk hi. A nu min Maacah ^{▼▼13.2 Septuagint khutgelh tampen le Syriac ah (2Kh.11:20 le 1Ku. 15:2 zong en in); Hebrew in Micaiah} hi a, Gilead a Uriel’ tanu ^{▼▼13.2 Ahikeh tuanu} khat ahi hi.

Abijah le Jeroboam a kido uh hi. 3 Abijah in gal sim dingin galdo thei mi tul zali tawh kuana, ama langah Jeroboam in galdo thei mi galkap tul zagiat tawh a pang hi. ^c

4 Ephraim mualtung gam sunga Zemaraim Vum ah Abijah dingin, “Jeroboam le Israel khempeuh aw, ka thugen ngai un! 5 TOPA Israel Pasian in David le ama suante tungah kumpi hihna a tawntung thukhunin a piak lam thei lo na hi uh hiam? 6 Tua hi napi Nebat tapa Jeroboam, David tapa Solomon ulian khat in ama pu a lehdo hi. 7 Ama kimkot ah mi helhot pawlkhat kikhawm uh a, a khangmoi lai, thukhentat thei nai lo amaute a lehdo dingin a hat nai lo Solomon tapa Rehoboam a langpan uh hi. ^d

8 “Tua hi-a tu-in David suante khutah a om TOPA kumpi-gam do dingin na geel uh hi. Galkap tampitak na hi mah uh hi, Jeroboam in a bawl kham bawngnote na pasian dingun na kem mah uh hi. 9 Ahi hangin Aaron tapa TOPA siampite hawlkhia-in gamdang mite hih bangin na siampi ding uh phuaktawm hi lo na hi uh hiam? Bawngtalno khat le tuutal sagih tawh a ki-ap dinga hong pai peuhpeuh pasian ahi lote siampi a suak uh hi.

10 “Ko aa in ahileh TOPA kote Pasian hi-a, amah ka taisan kei uh hi. TOPA nasem siampite Aaron tapate hi uh a, Levi-te in amaute a huh uh hi. 11 Amaute in zingsang sim le nitak simin TOPA tungah meihal biaknate le gimnamtui a pia uh hi. Amaute in biakna ngeina-in a siangtho sabuai tungah anlum lui uh a, nitak simin kham meivak tunna tungah meivakte a vak uh hi. Kote in TOPA ka Pasian uh hong sawlnate ka sem uh hi. Ahi hangin note in amah na taisan uh hi. 12 Pasian in kote hong ompih hi; amah kote makai ahi hi. Ama siampite in a pengkulte uh note langah galsimna in a awngsak ding uh hi. Israel mite aw, zo lo ding na hi manun na pate uh Pasian TOPA langah do kei un,” a ci hi. ^e

13 Tu-in Jeroboam in amaute nunglam ah galkapte umcihsak a, amah Judah mailam ah a om laitak in amaute nungah a pangsimte a om uh hi. 14 Judah-te kihei uh a amaute nung le mai-ah a kisim lam a mu uh hi. Tua ciangin amaute in TOPA a ko uh hi. Siampite in a pengkulte uh mut uh a, 15 Judah mite galdona a awng uh hi. Amaute galdona awging hangin Pasian in Jeroboam le Israel khempeuh Abijah le Judah mai-ah a tai keksak hi. 16 Judah mai-ah Israel-te tai uh a Pasian in amaute khut sung panin a hukhia hi. 17 Abijah le a mite in amaute tungah supna nasiapi tun uh a, Israel mi galsim theite lakah mi tul zanga a si uh hi. 18 Tua thu hangin Israel mite thakiam uh a, Judah mite in TOPA Pasian muang uh ahi manin a gualzo uh hi. ^f

19 Abijah in Jeroboam nungdelh a ama tung panin Bethel, Jeshanah le Ephron khuapite, a kima khuaneute tawh a la hi. 20 Abijah hun sungin Jeroboam in vang a nei zo nawn kei hi. Tuateh TOPA in amah sattukin a si hi.

21 Ahi hangin Abijah thahatna a khang hi. Amah in zi sawm le li pi a, tapa sawmnih le nih le tanu sawm le guk a nei hi.

22 Abijah man lai-a a sep dangte a nasepsa le a thugensate kamsangpa Iddo ciamtehnasa sungah kigelh khin hi.